逃遊無忌: 中國廣東省真溫泉系列 (9) - 中山溫泉賓館 [自由行]

因為港珠澳大橋的開通，中山溫泉賓館是廣東旅遊溫泉水溫水質認證名單中距離最近香港之一。從香港坐直通巴士經珠澳大橋去三鄉，大約只需要兩個多鐘。

因為要到中山辨一些事，而一直沒有旅行團住中山溫泉賓館，所以就襯今次機會去住一住。

訂酒店：

因為是自由行，所以係網上訂酒店，不過最後國內朋友幫忙訂了房間。基本上 ctrip 或美團的價錢也是差不多。

中山溫泉賓館房間分四種；分別喺中心園、親水區、商務園及別墅區。中心園嘅房間比較舊，離溫泉區遠一點，所以價錢平啲。親水區係日式榻榻米，比較新同埋樓下就係溫泉區。商務園及別墅區房間比較大及有私人浴池，而價錢貴很多，所以最後選擇了親水區房間。

平時房價只要六百多元，今次星期六去就要 $1180。

交通：

直通巴士由粤港巴士承辦，在太子、沙田、荃灣、觀塘也可以上車。

買飛可以在微訊關注深港榮利辨理，不過用微訊付錢就要計人民幣，如果在門市買就計港幣。微訊支付可以用微訊香港，會自己轉成港幣付款。

星期六要早些買飛，因為假期早上好多人上中山。

第一天

一早到了太子坐 8:45 鐘車。

太子榮利直通巴服務中心
香港旺角運動場道7號
+852 2397 0333
https://maps.app.goo.gl/vvCFKZSUtzKvfmWb9

但架車遲到 8.52 才開車，還要兜了去沙田才去港珠澳大橋。8:14 到沙田，9:43 到港珠澳香港關口。基本上現在都好少人用港珠澳大橋，所以 10 分鐘已經過了關，10:00 再上車，10:36 就到珠海關口。

港珠澳大橋珠海口岸
澳門
https://maps.app.goo.gl/KAofw4AczeKBP7Tk8

又係 10 分鐘過了關，11:00 上車，即是由太子上車到珠海花了差不多 2 個鐘，比想像中慢。榮利網頁寫到珠海 9:45 分，基本上完全不對，而且全程已經沒有塞車，非常𣈱順。當然如果以前經虎門大橋，花 3-4 個鐘其實係常態。

車再行了 50 分鐘，就終於到了三鄉雅居樂車站。

雅居樂客運配客站
長途汽車站
中山市振華路8號
https://surl.amap.com/t5C5zVh2Ps

景點：

📸大潤發(三鄉店) 【當地大型商場】
中山市三鄉鎮廣場路與景觀大道交匯處
https://surl.amap.com/76X2lBX7dR

因為未到食飯時候，所以就到當地嘅大型商場行下，入面有間大潤發，咁就行下超市。

國內超級市場好大，基本上咩嘢食物都有得買。

好欣賞國內好多嘢都好有創意，正如呢個買菜嘅地方，都加咗一個自動灑水系統，令到啲菜唔會乾，保持濕潤、翠綠。香港百佳啲菜，好多時都好殘。

不過創意用在小動物身上面就好殘忍，呢一啲就需要改進。

秋風起又係食臘味嘅時候，個臘味檔真係多到揀都唔知點揀。

之前係香港搵極都搵唔到嘅 cornmeal 用嚟煮西湯，居然比我係呢到搵到。

基本上每一間超市都有自助收銀區，好方便。其實好唔明香港啲超市，點解仲係大部份人手收錢，好多時都要排長龍，究竟香港科技上出左乜嘢問題？我十幾年前係澳洲已經見到這些自動收銀機，香港超市年年賺錢，但完全冇諗過投資喺可以提昇顧客體驗嘅方面。

午餐：

🍽 威尼斯西餐廳(三鄉店)
中山市三鄉鎮三鄉鎮文昌路雅居樂柏麗廣場K幢
https://surl.amap.com/tapzUjyeno

大衆點評
http://m.dianping.com/appshare/shop/574134

呢間餐廳係本地人朋友介紹，除了食物，呢度啲服務真係冇得頂，我攞住個手拖喼一入門口，就有個妹仔幫我攞入去保存好。然後由我喺地下上去 2 樓座位，已經不下七八聲歡迎、多謝光臨，五星級酒店都冇咁好服務。

我哋點咗3樣嘢，呢個蠔仔焗飯真係好好食，係香港未食過。

豆漿皮又係未食過，味道似腐竹，但煙韌啲好食好多，形狀似闊麵，而且上湯好鮮甜。

好鍾意食芥菜，呢個東芥苦得嚟好甘甜。唔明香港買啲菜都係國內運嚟，但就梗係冇喺國內食到啲菜咁好味。

食完之後我哋就坐呢啲嘟嘟返酒店。

酒店：

🏨 中山溫泉賓館
中山市中山溫泉旅遊區內
https://surl.amap.com/twFbO7mbUg

一入到溫泉區四周圍都有綠化，成個園區好靚、感覺好寧靜、好舒服，市政府應該畀咗好多錢去開發旅遊事業。

去 Lobby 嘅途中有一嚿大石，就係以前鄧小平南巡嘅時候嚟過呢度講咗句說話『不走回頭路』，可以見證中國改革開放的歷史。喺酒店後面有一座羅三妹山，可以去行山，上面有個鄧小平嘅銅像，我哋今次就冇去到喇。

🏛大堂 Lobby；

大堂是中國式不是好華麗那一種，但酒店已經有幾十年歷史，算係保養幾好，亦都曾經接待好多中國領導人。

親水區佢距離 Lobby 有一些距離，行過去大約十分鐘，我哋就坐電瓶車過去。

親水區嘅 lobby 其實就係溫泉入口，住客喺地下登記就可以入去溫泉區。

酒店旁邊有一堆爛尾樓，亦都見證咗中國改革開放發展嘅歷史。

🛌房間 Room：

房間基本上好細，不過佢用咗日式榻榻米設計，感覺上有返啲空間感，不過要千幾蚊一晚其實都幾貴。

酒店範圍都幾大，各部分都有一些距離。

♨️户外溫泉:

溫泉區開放時間由 9:00am-01:00am，好夜都有得浸。不過範圍不是很大，中間的大池唔係溫泉池，係凍水，只有旁邊的細池係溫泉池。

除了親水區入口，這個才是溫泉的主要入口，在中心園對面。

其實入場價錢都幾貴但都好多人，而家國內人真係好捨得消費。但最受歡迎其實係泳池同埋兒童嬉水區，好多一家大細假期嚟玩。

由親水區入園區，因為一早才冇咩人，但之前晚上係多人到不好意思影嘢，而且夜晚非常黑。

溫泉基本只有三十多個池，以房間的數目非常不夠，夜晚多人到插針都插唔入，而且我哋晚上嚟發現啲池水好污濁，好多浮游雜質，感覺有些不太乾淨。去過好多溫泉泉酒店，今次是第一次，唔通中山溫泉賓館咁出名，其實虛有其表？

我哋早上嚟到，發現啲水都係好濁，唔通琴晚冇換水？

後來發現原來好多浮游雜質係酒店加咗啲生果、草藥落去池水。通常其他酒店會用個袋袋住，唔知點解呢度就噉加落去，最後就碎曬沉咗落池底。

之後再發現其實所有池水夜晚都係放清，然後早上先至再加入新的泉水。問一問個工作人員，佢話啲池水係噉樣，其實唔係唔乾淨，只係因為礦物質太多。

如果用以下準則評分，中山溫泉賓館給予5分。
5分 - 真溫泉，且有保健療效。
4分 - 真溫泉，但保健療效一般。
3分 - 真假一半半，不肯定。
2分 - 假溫泉，但造得幾似。
1分 - 假溫泉，全化學味。

雖然園區太細，溫泉池不足夠，而人又太多，但啲泉水應該堅的。而且唔知係唔係有功效，因為之前去咗土耳其皮膚干燥一直都好痕，但居然今次浸完就好返，唔知關唔關啲泉水事。

(以上評論，純粹個人感覺，完全沒有科學跟據，不喜勿插。)