逃遊無忌: 中國廣東省真溫泉系列 (4) - 台山頤和溫泉大酒店 [大航假期]

台山頤和溫泉大酒店在廣東旅遊溫泉水溫水質認證名單中，是第二批受到認證的真溫泉酒店，台山現有三間溫泉酒店在名單中。

報名：

過年前又去了一次浸溫泉，本來係參加美味假期去第二間酒店，但因為不成團，所以臨時臨急只有周圍搵已成團的參加。找到大航假期有這一團剛剛成團，所以便參加，最近來說，大航假期相對比較容易成團，出團多。

今次團費 $839+120小費，上網查一查，台山頤和溫泉城大酒店居然要3000多元一晚，有冇人訂呀？不過其實平時都是千多元一晚，唔知點解呢個星期六突然咁貴，所以跟團性價比高一些。

還有網站有3000多個住客評論，5分滿分，平均居然有4.9分，十分難得。而單張寫酒店是廣東省服務最好的溫泉，馬上對這間酒店有些期望。

今次是找上次大航假期導遊翠如 BB 報名，因為上次她説下次可找她報名，所以試一試。她回覆也快，報名、交錢一日攪掂。奇怪大航可以比導遊接觸客户幫手報名，可能前線員工唔夠。

行程：

領隊、導遊：

呢個就係今次嘅導遊，肇慶人，90後，但好有經驗，我叫佢桃桃。今次又係女導遊，我懷疑溫泉團都係女導遊，可能行程比較簡單，女導遊容易 handle。不過有經驗又唔表示做得好，今次導遊做得好 hea，食飯又冇跟餐，入住酒店又冇查房。重要有個新人跟住，兩個人都唔知做咩。

旅遊巴：

今次架巴士好細架，雖然只有33人，但車細，座位比較窄，前面椅挨後就好迫。座位前有網袋放嘢，行李架又比較窄，好難放嘢。細車所以冇中間門上落，比較麻煩。

團友：

全團33人，今次一個 10人 party，其餘多數是一pair pair。團友青年和中年多，冇咩老人家，共8組人。

第一天

集合：

今次也是深圳灣集合，可能因為下星期過年，今個星期少人出來玩。集合處冇咩其他旅行社。

集合攪了很耐，因為有團友遲到。之後就開車去食飯，今次車程比較長，所以沒有景點。而且虎門大橋同黄埔大橋非常塞車。行了兩個鐘才到服務站。行行下又因為撞車，塞了兩個多鐘才到食飯地方。差不多三點半才到餐廳。

就算沒有塞車，明顯地旅行團選擇餐廳錯誤，食飯地方不順路。因為食完午飯，車是走回頭路差不多大半小時才回到酒店。最近去廣東省多次，也未試過這樣。

午餐：

🍽利眾生態園【酵素全豬滋補宴】
https://goo.gl/maps/McmuXbJ2BrE2
地址：台山市端芬鎮龍山工業開發區

午飯在一個生態農場，所有食材也是園裏出産。

農場範圍都幾大，有魚塘、豬場、雞場及菜園。

最出名就係所謂嘅酵素豬及酵素雞，不過午餐係打邊爐，其實食唔到啲豬同雞有幾好食。

反而呢碟無骨魚幾特別，團友好快就食曬。

同埋啲野菜幾好食，好鮮甜、好有菜味。

臘味飯都幾好食，啲臘味唔肥，不過因為遲大到，所以啲飯好似焗咗好耐。

今次33人，但只分了3張抬，每圍10-12人，坐得比較逼狹，同上次8人一抬差好遠，大航好似冇咩標準。

佢重有外賣，可以送到附近酒店。海報寫是大航獨家，如果住在附近，也可以一試。

食飯之後走大約30min分鐘去酒店，最後差不多5:00pm 才到酒店。

酒店：

🏨台山頤和溫泉大酒店
https://goo.gl/maps/Zs6hB76qpfM2
地址：溫泉圩台山頤和溫泉城

台山頤和溫泉城大酒店位於三合鎮溫泉圩，附近都是鄉下地方。酒店佔地1500畝，是集溫泉、旅遊、文化、度假、養生、養老、商業、居住等功能。不過其實又是房地産發展，主要都是想做旺個地方，等啲樓好賣啲。

酒店2015年開業，有大約350間房，在台山溫泉區算是比較新的酒店。導遊話酒店前身係國家幹部療養院，泉水是富硒溫泉，出名對養生有療效。

一去到酒店門口，就有工作人員派毛巾、派嘢飲。

大堂裝修得幾豪華，設計比國內酒店好，但又比不上國際級數。

剛剛食完午餐，一去到酒店又食下午茶，因為旅行團包咗，而酒店又已經安排咗。但其實都冇嘢好食，只係得中式糕點。

一去到房間 Corridor 就呆咗一呆，因為入去個門口唔係好大，但個走廊就好闊好高。

Room

房間大約 55m²，一廰一房開放式設計，裝修用料也不錯，不過䦕始有些地方有破爛但沒有修整。

房裏有一個小電磁爐可以煑吓嘢。

廳同房的比例幾合適，感覺闊落舒適，如果係香港有間咁嘅 studio flat 都幾好。

外面有個小露台，擁有私人溫泉池。

酒店最差的是還境，雖然範圍很大，但沒有什麼綠化去分隔酒店及外圍。從露台向外望就是大街，大街的人很容易便可以望向酒店房間。

浴室設計時尚、但用料不是很高級，牆上瓷磚也有些破爛，潔具也只是一些仿牌子貨色。

酒店標榜有不同抌頭可以借用，但因為入住時間太遲，所以沒有花時間揀選。但床褥只是普通，可接受，不太好，但又不太差。

房間也放了一些生果，朱古力及兩包鮮奶，服務幾好。

樓下有小買店，可以買些小食或土產。

酒店對出就是大街，有餐廳及買土產店，但舗不是太多，而且好像跟酒店一起興建，新發展區。

♨️溫泉:

台山頤和溫泉大酒店受到廣東旅遊溫泉水溫水質認證，由其重要是泉水含有硒原素，據稱對 cancer 有冶療作用。

國內最出名富硒溫泉在江西明月山，而頤和溫泉含硒量同明月山差不多。

酒店溫泉水差不多冇色冇味，試浸之後，皮膚不會皺皮，浸完有滑溜的感覺，好似幾堅。

酒店除了溫泉園區，房間還有獨立溫泉池，而且設計也有特色，可以從浴身進入溫泉池，不用出客廳再出露台，設計藉得一讚。

不過露台對出私穏度差，窗簾設計、用料也有問題。從外面可以看到裏面的身影，如果祼浸要小心，不要靠近窗簾。

而且窗簾沒有位置扣住，大風吹會把窗簾吹起。

因為當晚大風，要用椅子頂住，避免窗簾吹起。

泉池的用料也是麻麻，材質表面光滑，容易跣倒。而且多角位，不小心就踫傷。

連著水塞的繩，居然只是一條幼麻繩，而且橫跨泉池，容易 kick 倒。

還有之後發現溫泉園區的溫泉水同房間的好像不同，房間的好像稀一些。

去溫泉園區要坐這些電動車，因為在叧一坐建築物，其實走路也可以。雖然園區同酒店是在同一範圍，但因為綠化設計差，感覺好似去到第二條街浸溫泉，沒有了高級 Resort 的氣派。

溫泉園區外圍，感覺去了街外，不是在酒店範圍。

前身是國家干部療養院。

溫泉入口

可能前身係療養院，所以溫泉源區入面沒有好多花巧嘅設施。大概只係分成三個區：一個泳池區同埋兩個細水池區。

溫泉園區入口

露天水療區，晚上又有人打碟及表演。

露天游泳池連休閒吧，可以一路浸溫泉一路飲嘢。還有園區四周也有免費薑茶及蒸餾水。

大唐盛世區即係小水池區，有些泉水有添加，有些沒有。

南洋風情區是叧一個小水池區，只係不同的園藝設計。

石板床，不過唔係好夠熱。

魚療池都可以，啲魚有反應，但要另外畀錢。

天體浴鎖了門，唔知道裏面係點樣？

有乾蒸房同濕蒸房，比較弱。

有一個小型水上樂園，而且係暖水，冬天都有得玩。

不過設計好危險，有一個溫泉出水池，池水89度，雖然寫了牌叫人小心，但如果人多小朋友跌咗落去就大獲，都唔明白怎樣設計。

有一個室內游泳池，係暖水，而且係溫泉水。

室內水療室就很多維修緊，基本上園區有很多設備都雖要維修，而且有很多設計上的問題，好似兒童樂園。

喺大池嘅水療按摩床，啲開關做到亂曬籠，好唔就手，都唔知點設計。

好似呢個小水池，個按摩噴嘴居然喺上落樓梯級度，喺度按摩就會阻住人哋上落，好奇怪。

所有小溫泉池設計，尺吋、深度、材質非常隨便，不太合乎人體工學。而且有一些石材都幾滑，容易跣腳。還有夜晚園區燈光不足夠，好多時落水池樓梯級都睇唔到，好容易叉錯腳或者撞到。

很多石材破爛，沿邊比較鋒利，一不小心就會刮傷。

池邊也有一個溫度計，可以知道水溫，不過因為原溫泉水有89度，而設計上出水位唔係喺隱蔽地方，反而好多時係水池上落嘅地方，一唔小心行埋去就會燙傷，所以溫度計作用一般。

不過好處係啲溫泉水真係夠熱，而且好多時園區嘅設計都保留咗一啲老榕樹，好有特色。

如果用以下準則評分，台山頤和溫泉大酒店會給予5分。

5分 - 真溫泉，且有保健療效。
4分 - 真溫泉，但保健療效一般。
3分 - 真假一半半，不肯定。
2分 - 假溫泉，但造得幾似。
1分 - 假溫泉，全化學味。

雖然園區設計、溫泉硬件設施都普通，但水質真是一流。而且有大溫泉池，原溫泉水溫度有89度，應該是真溫泉。而且可能因為泉水夠熱，浸完之後真是有舒筋活絡的感覺，皮膚也非常滑溜，不愧為廣東第一泉。