今次也是跟行動不便的老人家去行山，之前睇過個電視節目介紹河背水塘，說到是適合無障礙人士，咁結果又係唔係呢？
路徑簡介：
河背水塘是元朗八鄉一個灌溉用水塘，位處大欖郊野公園內，用作灌溉新界西北部農田。相比大型水庫，它更像山林中的小湖泊，水源充足時，沿岸層層綠林和湖中小島，十分像潛在水中的千年大海龜，只露出翠綠的龜殼。除了入口前一段緩緩的爬坡，山徑都是平坦泥路，非常好走。最後一段接上本地少見的S型水壩，一邊是高17.4米的排水口，一邊是被水色包圍的小綠洲，夾在人工與自然之間。步道附近還有營地和有機農莊，最適合一家人親親大自然。
長度：2.1 公里
時間：1.0 小時
地區：新界西區
綜合難度 ★☆☆☆☆ (1 星 易行)
長度 ★☆☆☆☆ (評分 1 星)
時間 ★☆☆☆☆ (評分 1 星)
坡度 ★☆☆☆☆ (評分 1 星)
路面狀況 ★☆☆☆☆ (評分 1 星)
遮蔽度 ★★★ (高)
路線圖 (只供參考)：
交通資訊：
如果搭車去地鐵元朗站 B 出口行去舊墟泰衡街，近大榮華酒家就係 71 號小巴站。
如果搭車去地鐵錦上路站 C 出口就係專線小巴站。
如果搭 71 號，元朗滿坐就唔經錦上路，大約 25-30 分鐘就到達河背村。
河背村車站就係村公所。
假期好多人，不過小巴都好多，所以也不用等很耐。
景點：
落車跟住呢個路口行就得，司機都好好人，指比啲行山人士點樣行。
行咗冇耐就見到棵大樟木樹，遠看不覺得怎樣，其實四個人也抱不到，香港好少咁大棵樹。
樹旁就有個士多可以補給。
一直向前行就去到郊野公園範圍。
雖然話唔比車行，但當日也有車行上，單程路要小心啲。
雖然是平路，但其實一直行上山，都幾斜。
條路斜，啲單車又唔收制，所以更加危險。
睇片好似冇幾快，但現場感受啲車就係咁衝落嚟。
去到高處就可以眺望整個河背村及港鐵八鄉車廠。
呢到有個河背營地，都幾好環境，當然關閉中。
旁邊有個小瀑布，難得冇乜落雨都仲有水，如果以前細個一定跳落去游水😜。
上去之前緊係要鬆一鬆。
距離水塘還有一半路程，而條路是繼續上斜。
途中有一個青年協會有機農莊，但因為疫情關係所以不對外開放，但也有少少農產品係門口賣。
終於到達水塘，向前行就是河背水塘家樂徑，向左行就是水壩，穿過水壩也是河背水塘家樂徑，因為家樂徑是行經水塘一個圈，所以從左邊或前面去也是一樣，不過大部份人也是先去水壩再前行。
如果水滿啲，又真係幾似龜殼。
另一個角度看都係好有氣勢。
行了粒幾鐘，終於到達入口。
呢度可以行去荃錦公路，不過有排行。
開始都是這些平泥路，但不算太平，有好多石，好明顯電視節目條友冇推過輸椅🙄，跟本不知道無障礙是什麼意思。
因為家樂徑好近水塘，所以有好多小路可以落去水塘邊，風景更加美麗。
有些路段是這種凹凸不平的路，事實證明香港是完全不顧及無障礙人士。去過外國好多郊野公園，基本上也有照顧到無障礙人士的需要，連國內嘅設施也好過香港九百幾萬倍😤。
最大分別是香港用石屎鋪路，日久失修全部變成爛路，而且鋪製手工非常粗糙。外國郊野公園多數用木鋪砌棧道，好似上面的小木橋。好處是非常平、可依地型而建造、容易維修、而且跟環境配合。香港啲官好似完全唔知世界發生緊咩事，什麼事也求求其其😪。
行了一半路程，就會到傳說中的美麗竹林小徑，十個人行河背水塘，八個應該都是為了在這裏打咭。
明顯的打咭位，所以冇哂竹生長。
又一條好靚的小木橋。
沿途也有這種大竹，我記得以前細個行山好多竹林，現在好似越來越少，所以我唔明點解有竹就要講係日式囉🙄。
又到排街症時間。
逃遊後記：
香港的郊野公園是完全唔適合無障礙人士去享用，我曾經去過好多外國地方，基本上也會照顧到無障礙人士的需要，可能外國行動不便的人多，但作為國際城市，好多公共設施都好簡陋。希望政府新一輪撥款，可以做好啲，其實攪好啲路才是最重要。
另外又一次證明傳媒報導的誤導性，只係由河背村去郊野公園的斜路，已經冇辦法推個坐輪椅嘅人上去，又怎可以講係無障礙，而且條路還有車及單車行。
其實我寫這些遊記，目的係想記錄行程的真實情況，希望有需要的人去之前有心理準備。網上有好多好多行山資訊，但有時我只是想找這段路的路面情況、多唔多石級或斜路就比較少資訊，所以記錄下希望有用。
2021/05
沒有留言:
發佈留言