郊野樂行系列 (4) - 紅梅谷自然教育徑+望夫石

上網找行程，發覺自己由細到大見到望夫石和獅子山無數次，原來從未去過。咁趁住紅梅谷燒烤場未開返，冇咁多人就走上去行個圈。

不過郊野樂行網站話春夏之交，紅梅谷佈滿萬紫嫣紅的楊梅，去到影都見唔到。

路徑簡介：

 

紅梅谷自然教育徑 郊野樂行網站連結  

 

每年春夏之交，紅梅谷佈滿萬紫嫣紅的楊梅，紅梅谷因而得名。此教育徑位於獅子山郊野公園內，初段雖較為陡峭，但隨著山徑上行，坡幅漸趨平緩，屬於易行的自然教育徑。紅梅谷雖與市區只一山之隔，卻已是截然不同的兩片天地。起點附近可見細葉榕長長的氣根隨風垂擺，好看之餘，滿谷的植物更為周遭添加新鮮空氣。其他特色植物有荔枝等，一家大小都能寓教於樂。行畢自然教育徑後，右轉上級，再往上行，便可見香港山嶺地標之一的望夫石。望夫石高約30呎，原為一塊矗立在山崗上的大石，後因風化變成一大一小兩塊石頭，狀似大人揹著小孩，加上村民的想像力及香港的漁村傳奇，遂產生了婦人揹著小孩等待丈夫回家的傳說，是家傳戶曉的故事。 

 

長度：1.3 公里

時間：1.0 小時

地區：新界中區

綜合難度 ★☆☆☆☆ (1 星 易行)

長度 ★☆☆☆☆ (評分 1 星)

時間 ★☆☆☆☆ (評分 1 星)

坡度 ★☆☆☆☆ (評分 1 星)

路面狀況 ★☆☆☆☆ (評分 1 星)

遮蔽度 ★★★ (高)   

  

路線圖 (只供參考)： 

 

 

交通資訊： 

 

如果由九龍坐巴士經獅子山隧道向沙田方向出發，可以乘搭 81C, 85, 85B, 87B, 89B, 170, 182, 182X, 281M, N170, N182, N281 在世界花園站下車。

落車之後向返後行過對面馬路。

過咗馬路之後就向上再行會見到巴士站。

如果由新界出發可以搭經獅子山隧道出九龍的巴士 81C, 81S, 86A, 87B, 281B, 281M, N281，落車向前行。

有個安全島可以過對面馬路，不過啲車行得好快要小心。

見到樓梯上去就係紅梅谷路燒烤場。

如果揸車，樓梯對面有個好細嘅停車場，不過應該都幾難泊到車。

景點：

入口前就有廁所，啱曬我哋老人家。

入口左手邊原來已經有第一個教育景點。

棵荔枝真係好大，而家已經打咗好多花冧，今年可能大豐收。

樓梯上就係紅梅谷自然教育徑開始。

燒烤場仲係封咗，如果唔係呢度假期真係人山人海。

去到呢個分岔口，教育徑由右手邊去。如果想直接去望夫石及獅子山可以由左邊樓梯一直上就到。

沿途一直照著指示牌行就可以。

又係一啲冇水嘅石澗，搵條魚毛都見唔到。

怪不得係山中只聽到雀仔聲。

開始一段路就係這些樓梯一直係咁上、係咁上、係咁上.....

啲樓已經畀啲樹遮住哂，只係睇到少少，其實做個牌呢做咩？

樓梯完咗開始就是這種山路，都算好行。

呢舊石真係好得意，好似比把刀斬開咁。

估唔到沙田空氣咁好，啲苔蘚生得好厚實。

去到呢度轉上石級，又係不斷咁係咁上、係咁上.....

點解上次條教育徑講啲嘢都係差唔多？

行咗大約大半個鐘，就去到麥理浩徑第五段，再前去就可以上望夫石。

麥理浩徑第五段好好行，路又闊又平，又好風，好清爽。

這些引水道以前細個會走落去捉魚、捉蝌蚪玩，攞咗啲蝌蚪返屋企養，唔知點解從來都養唔到變青蛙。不過這些自然教育肯定比正常教育好十萬倍，雖然應該係犯法的。

沿途一直都見唔到望夫石，只係呢個角度見到少少，但係角度唔啱完全唔似。

見到前面好多人就知道到咗。

教育徑到這裏就是終點了。

如果繼續向前行會去沙田其他地方，向左落樓梯就會去返燒烤場，即係教育徑開始個分岔口向上個條樓梯。

向右走就可以上去望夫石或獅子山。

不過其實可以兜一兜先去望夫石再去獅子山。

之後就係這些長命梯級係咁上、係咁上、係咁上....行足半個鐘。

到咗呢個分叉口右邊樓梯上望夫石，左邊就可以去獅子山。

終於到達好感動😭

近睇其實邊個角度睇都唔似望夫石。

今日唔算多人，我用咗 wide angle 影，好似好闊落，其實上面好細。如果多人喺度行嚟行去，唔小心跌親，其實幾危險，所以可能點解門口要整個鐵閘，限制人流。

見到左邊紅衫那個人嗎？其實一跣腳就會跌落萬丈深淵🙄

喺望夫石條路，再前去就可以去獅子山。

如果原路落返梯級，就可以從這裏返返去燒烤場。

全程都是這些樓梯，非常好行。

話咁快就到咗燒烤場完成整個旅程。

逃遊後記：

我自己找路線通常都是找實質有路，漁農處有修葺的山路而行，所以才主力在郊野樂行網站找尋路線。不過近年行山人士多咗，又多咗人打卡、呃 like，造就了一股向難度挑戰的風氣。

今次上到望夫石，其實完全冇危險，問題在見到有很多人為了影相打卡，走到去最邊邊的石頭影相，有時冇路就在石頭之間跳來跳去，險象環生。

而當某些險峻位置有人在打咭，有些人又不排隊，不理這個位置只能容立一、兩個企位，也不等待正在打咭的人安全返回，就心急走上去霸位影相，一跣腳，可能大家就攬住一齊跌下去，令到情況更加危險。

而有些父母又不理會同行小孩，好多頑皮小孩也是在石頭、梯級之間跳來跳去，一不小心好容易掉下山。

昨天飛鵝山自殺崖的意外 近年飛鵝山行山意外一覽，原來近年已經有 17 宗意外。大佬去行山啫，使唔使搵命搏，真係完全唔明啲人點諗？香港人自我意識真係咁低？咁需要認同感？咁需要在同輩之中攞威？其實簡單地行哂全部麥理浩徑已經好威威。

奉勸大家，珍惜生命，人哋做到嘅嘢唔表示你做得到，亦都跟本冇需要去跟人做。所有娛樂運動都係為咗消磨時間，唔使咁認真嘅！

2021/04