郊野樂行系列 (3) - 金山家樂徑

今次又係去馬騮山，因為陪伴有少少行動不便的老人家，近市區又容易行。上次去 鷹巢山自然教育徑 係山上，今次就係山下。沿途風景最出名就係多馬騮出沒，不過今次發現啲馬騮已經比起幾年前少了很多，應該都係幫佢哋絕育嘅原因。

路徑簡介：

 

金山家樂徑 郊野樂行網站連結 

香港的猴子不住水簾洞，大部份住在俗稱「馬騮山」的金山內。金山家樂徑從九龍水塘和石梨貝水塘起步，沿路綠樹林蔭，是以樓梯為主的上坡路，可回望九龍水塘美景，受晨運人士歡迎。走至盡頭會重回金山路，是香港少有能夠近距離觀察獼猴的地方。野生獼猴雖然不會主動襲擊人，但會被食物吸引，大家要管好攜帶的乾糧和背包，更切勿餵飼或太過接近牠們。

 

長度：1 公里

時間：0.5 小時

地區：新界中區

綜合難度 ★☆☆☆☆ (1 星 易行)

長度 ★☆☆☆☆ (評分 1 星)

時間 ★☆☆☆☆ (評分 1 星)

坡度 ★☆☆☆☆ (評分 1 星)

路面狀況 ★★☆☆☆ (評分 2 星)

遮蔽度 ★★★ (高)  

 

路線圖 (只供參考)： 

交通資訊： 

 

如果向沙田方向可以搭 72 或者 81 號巴士係石梨貝水塘站落車。

巴士旁就有廁所，去完就沿大埔道直行。

左面就係金山路，向下行就可以到達九龍水塘。金山路平時駕車可以駛入，假日就封閉，所以平時行就要小心車輛。

如果從沙田來，過對面馬路右手邊就係金山路。回程都是搭 72 或 81 號巴士，也有小巴出佐敦道。

景點：

沿著金山路向下行一陣就見到九龍水塘。

不過最近冇咩落雨，個水塘冇咩水。 

上次行鷹巢山就見唔到鷹，今日就見到係水塘上面飛嚟飛去，唔知係未想捉魚。

沿著主壩繼續行就會去到好靚嘅水塘。

九龍水塘有個副水塘，都係冇咩水。

過咗主壩就到涼亭，左手邊可以去樹木研習徑，下次再去。

車唔入得但電單車就照入。

電單車就幾型，但係班司機就幾騎呢，男人嘅浪漫🤔？

再前去左邊就有條山路可以過石梨貝水塘，有時間就可以行個圈。

這些避孕鐵籠呃過馬騮仔一次，你估佢哋仲會唔會上當？

有需要就入家樂徑之前搞掂埋佢。

家樂徑入口在右手邊。

走入去冇耐就有條小溪，以前這些小溪都好多水，好多昆蟲、魚仔、生物，而家搵條毛都冇。

係條河仔見到一隻好靚嘅藍色蜻蜓，上網查叫三斑鼻蟌，幾特別，不過只得一隻。

去到分岔路，兩邊都可以去到終點，左手邊就係家樂徑，短啲，右手邊條路會兜一個大圈，有時間就可以行下。

之後一半路程就是這些樓梯不斷向上行，估計有幾百級樓梯，其實都唔係幾家樂。

上到頂有一片空地，有好多蝴蝶飛嚟飛去，但係想搵隻停低影相都好難。

不過就搵到啲好靚嘅毛蟲。

上網查一查應該是這種豔粉蝶的幼蟲，但當時係附近又見唔到這種蝴蝶。

之後開始是平路，就行得好舒服，好快就到終點。

家樂徑出口去返金山路，所以如果唔想行幾百級樓梯，可以沿金山路斜路行上來，然後經家樂徑行樓梯向下返返轉頭。

家樂徑旁邊有個傻人樂園。

向上行有個涼享。

再向上行就有些建築物由晨運人士興建而成。

原來家裹老人家幾十年前是傻人樂園成員，佢話以前好熱鬧、每朝早都好多人嚟呢度，比現在起咗更多嘢。啲人係到飲茶、煮嘢食、傾計、做運動好開心。但後來就被政府取替了，現在只剩下回憶！

沿返金山路向下走就完成了整個旅程。

不過要小心，沿路走都係好多馬騮，一定要帶行山杖傍身。

你估呢隻馬騮喺度做乜？原來佢喺度擺 pose 俾人影相，然後當你唔在意，就有另一隻馬騮爬過來搶你個袋搵嘢食，估唔到馬騮真係咁聰明識得裏應外合。有班大人係到影佢，帶住個細路趴喺條路度玩，隻馬騮就撲過去抓住佢個背囊，同一時間樹上隻馬騮仔就走落嚟幫拖，我喺旁邊都反應遲鈍咁先趕走咗佢哋。最後個細佬背脊瘀咗一大撻，估唔到啲馬騮仔咁好指力，小心！

逃遊後記：

馬騮山帶給我好多童年回憶，無論是小時候父母時常帶我哋去行山、燒嘢食。或者大少少自己跟朋友、同學由家裏行上馬騮山玩，又或是讀中學每天搭車也會經過大埔道，都帶來很多人和事的回憶。幾十年以來其實馬騮山改變不大，香港可以說只有郊野公園是比較能維持現況，其他地方幾十年來已經面目全非。不過同樣地幾十年可以改善的地方其實可以很多，但又好似什麼也原地踏步。是好，還是不好就見仁見智。